Op 10 Februarie het die eerste Limpopo XCO-bergfietsbyeenkoms by Stanford Lake College plaasgevind. ‘n Aantal Plasies het hieraan deelgeneem en reeds vroeg in die seisoen goeie plekke behaal.

Knap gedaan aan Sophia van Wyk in graad 11 wat ‘n 1ste plek in die Junior Dogtersafdeling losgetrap het. Anke Roodt in graad 12 was kort op haar hakke en het die 2de plek ingepalm. In die Jeug Seunsafdeling het twee graad 10’s, Aeden Anderson ‘n 5de en Wernich Steyn ‘n 8ste plek behaal. Xihlovo Mkansi in graad 9 het in dieselfde afdeling ‘n 15de plek verseker. Twee graad 8’s, Ilana Lubbe en Amelie Pretorius het onderskeidelik 3de en 5de in die Sub Junior Dogtersafdeling geëindig.

Die Limpopo XCO-reeks bestaan uit 4 byeenkomste waar ryers punte insamel om in aanmerking te kom vir die Limpopo XCO-span.

‘n Aantal bergfietsryers van Merensky Landbou Akademie het hul staal getoon by die Mango Mania-uitdaging wat op 16 Februarie in Hoedspruit aangebied is.

Ten spyte van die versengende hitte het bobaas Anke Rood in graad 12 ‘n 1ste plek in die Junior Meisies-afdeling losgetrap. Twee belowende graad 8’s, Ilana Lubbe en Ziante Steyn het onderskeidelik 3de en 4de in die Sub Junior Meisies-afdeling gekom.

Wernich Steyn (graad 10) het 5de en Xihlovo Mkansi (graad 9) 8ste in die Jeug Seunsafdeling gekom. Plasieland se twee graad 11’s, Marnu Lamprecht en Niko Coetzee was onderskeidelik 4de en 9de in die Junior Seuns-uitdaging.

'n Rekordgetal van 52 spanne van 2 het ingeskryf vir die jaarlikse bergfietsry interhuis wat op Woensdag, 17 Julie 2024 by Merensky plaasgevind het.

Die kompetisie het in aflosvorm plaasgevind, met rondtes van 1,2 km.

Die gemengde spanwenners van die dag was Sophia van Wyk en Jan Pretorius. JP Botha en Zander Knoetze het as seunsspanwenners uit die stryd getree, terwyl Layah Peterson en Chantené van Wyngaardt die dogterspanwenners was.